ओलम्पिकका लागि महिला फूटबल छनोट तालिका सार्वजनिक

साउन २०, काठमाडौं । सन् २०२० मा जापानको टोकियोमा हुने ओलम्पिक खेलकूदअन्तर्गत महिला फूटबलको छनोट तालिका आज सार्वजनिक गरिएको छ । 

पहिलोपटक एसियाली टोलीको छनोट तालिका सार्वजनिक भएको हो । पहिलो चरणको छनोटमा नेपाल समूह ‘सी’ मा परेको छ । नेपालसँगै भारत, बंगलादेश र म्यानमार पनि समूह ‘सी’ मा रहेका छन् । नेपालले पहिलो खेल भारतसँग आगामी ८ नोभेम्बरमा खेल्नेछ । यस्तै ११ नोभेम्बरमा म्यानमार र १३ नोभेम्बरमा बंगलादेशसँग खेल्नेछ । खेलस्थान भने टुंगो लागेको छैन । 

एसियाको पहिलो चरणको छनोटमा नेपालसहित १८ देशले भाग लिएका छन् । उक्त खेलमा अठार देशलाई चार समूहमा विभाजन गरिएको छ । जहाँबाट समूह विजेता र उपविजेता गरी आठ र उत्कृष्ट हुने दुई गरी १२ टोली दोस्रो चरणमा पुग्नेछन् । 

यसअघि नै भियतनाम र उज्वेकिस्तान सिधै दोस्रो चरणमा पुगिसकेका छन् । बाह्र टोलीलाई तीन समूहमा विभाजन गरिनेछ । समूह विजेता तीन टोली तेस्रो चरणमा पुग्नेछन् । 

तेस्रो चरण पुगेका तीन टोली र सिधै तेस्रो चरण पुगेका पाँच टोली अस्ट्रेलिया, चीन, उत्तर कोरिया, दक्षिण कोरिया र थाइल्याण्ड गरी आठ टोलीको दुई समूहमा प्रतिस्पर्धा हुनेछ । उक्त चरणबाट समूह विजेता र उपविजेता गरी चार टोली अन्तिम चरणमा पुग्नेछन् । 

अन्तिम चरणमा चार टोलीबीच ‘होम एन्ड अवे’ का आधारमा प्रतिस्पर्धा हुनेछ र उत्कृष्ट दुई टोली टोकियो ओलम्पिकमा छनोट हुनेछन् । 

ओलम्पिकको महिला फूटबलमा एसियाबाट तीन वटा कोटा छ । जापान आयोजकको हैसियतमा छनोट भइसकेकाले बाँकी दुई स्थानको छनोट प्रतियोगिताबाट हुन लागेको हो । ओलम्पिकको महिला फूटबलमा विश्वभरबाट छनोट भएका १२ टोलीबीच प्रतिस्पर्धा हुनेछ ।