ओमानमा रहेका २५ हजार नेपाली श्रमिकको हित संरक्षणदेखि जलवायु सहकारितासम्म राणाको योजना

असोज २७ , काठमाडौं । ओमानका लागि प्रस्तावित नेपाली राजदूत पदमाक्षी राणाले नेपाल–ओमान सम्बन्धलाई थप सुदृढ बनाउँदै श्रमिकको अधिकार संरक्षण, आर्थिक साझेदारी र जलवायु परिवर्तनसम्बन्धी सहकार्यलाई प्राथमिकता दिने कार्ययोजना प्रस्तुत गरेकी छन्।

मंगलबार संसदीय सुनुवाइ समितिमा आफ्नो चारवर्षीय रणनीतिक कार्ययोजना प्रस्तुत गर्दै राणाले श्रम कूटनीति, आर्थिक कूटनीति र जलवायु कूटनीतिलाई प्रमुख प्राथमिकताका रूपमा अघि सारेकी हुन्।

परराष्ट्र मन्त्रालयको तथ्याङ्कअनुसार हाल ओमानमा करिब २५ हजार नेपाली कार्यरत छन्। राणाले उनीहरूको हकहित, सुरक्षा र सीप विकासलाई प्राथमिकता दिने प्रतिबद्धता जनाएकी छन्। साथै, नेपाली श्रमिकका समस्या सम्बोधन गर्न तथा वैदेशिक रोजगारीलाई सुरक्षित र व्यवस्थित बनाउन आवश्यक पहल गर्ने उनको योजना छ।

आर्थिक कूटनीतिअन्तर्गत उनले ओमानको ‘भिजन २०४०’ सँग नेपालको आर्थिक प्राथमिकतालाई जोडेर कृषि, पर्यटन, नवीकरणीय ऊर्जा र विदेशी लगानीका क्षेत्रमा सहकार्य विस्तार गर्ने योजना अघि सारेकी छन्। यसबाट नेपालमा लगानी भित्र्याउन र दुई देशबीच आर्थिक सम्बन्ध विस्तार गर्न सहयोग पुग्ने अपेक्षा गरिएको छ।

त्यसैगरी, जलवायु परिवर्तनका असर न्यूनीकरण र विपद् व्यवस्थापनमा नेपाल तथा ओमानबीच सहकार्य गर्न सकिने राणाको भनाइ छ। जलस्रोत व्यवस्थापन र हरित ऊर्जाको क्षेत्रमा ओमानका अनुभवबाट नेपालले सिक्न सक्ने सम्भावनालाई पनि उनले औँल्याएकी छन्।

राणाले कार्ययोजना चरणबद्ध रूपमा कार्यान्वयन गर्ने प्रस्ताव गरेकी छन्। सन् २०२७ सम्म आधार तयार पार्ने, २०२८ मा साझेदारी विस्तार गर्ने, २०२९ मा सम्भाव्य क्षेत्रमा काम अघि बढाउने र २०३० सम्म उपलब्धिलाई दिगो बनाउने लक्ष्य राखिएको छ।