आरतीकी आमाले सन्तानको न्यायका लागि भन्दै धर्नास्थलमा छठ व्रत

मंसिर ४, काठमाडौं । आरतीकी आमाले सन्तानको न्यायका लागि भन्दै धर्नास्थलमा छठ व्रत बसिन् ।अघिल्ला वर्षमा उनी यतिबेला छोराछोरीको सुखको कामना गर्दै छठको व्रत बस्ने गर्थिन् । छठी माईसँग परिवारको दुःखकष्ट हटोस् भन्ने कामना गर्थिन् । धनुषाकी निर्मला साह यस वर्ष भने तिनै सन्तानको न्यायका लागि भन्दै दाइजोको निहुँमा छोरी आरतीले ज्यान गुमाएपछि दोषीलाई कारबाहीको माग गर्दै धर्नामा रहेकी उनले त्यही मनोकांक्षा राखेर छठको व्रत पनि बसेकी छन् ।

१ सय ५८ दिनदेखि छोरी आरतीको हत्या भएको भन्दै विरोधमा उनको परिवार न्याय माग्दै माइतीघर मण्डलमा  धर्नामा छ । सडकमै छठ पर्व मनाएका आरतीका परिवारको माग अझै पूरा भएको छैन । ‘छोरीको हत्यारालाई जेल पुर्‍याऊ छठी माई भन्दै व्रत बसेकी छु,’ निर्मला भन्छिन्, ‘देवीले सुन्छिन् कि भन्ने आशा छ ।’ माइतीघर मण्डलको चिसो भुइँमा दिनरात काट्दै आएकी उनीसँग छठी माईलाई पुज्ने सामग्री छैन । छ त केवल मनभरि आस्था र पीडा । उनी तीन दिनदेखि व्रत बसेकी छन् ।

बिहे गर्नुअघि दाइजोको मागअनुसार आरतीका बुबा विनोदले १६ तोला सुन र २५ तोला चाँदी केटा पक्षलाई दिए । केटा पक्षले लगाउने लुगादेखि गरगहनासम्मको खर्च आरतीकै बुबाआमाले बेहोरेको बताउँछन् ।

गृह मन्त्रालयले गत कात्तिक २० मा आरतीका परिवारलाई वार्तामा बोलाएको थियो । वार्तामा सहभागी भएका पीडित परिवारले ७ बुँदे मागसहित पत्र बुझाएका थिए । जसमा आरती साहको हत्यारालाई थुनामा पठाउनुपर्ने, पीडित परिवारलाई यातना दिने धनुषाका प्रहरीलाई निलम्बन गर्ने, न्यायिक छानबिन समिति गठन गर्ने, माइतीघरको धर्नास्थलमा भएका सांघातिक आक्रमण तथा अनुचित पक्राउ तथा यातनाको छानबिन गरी दोषीमाथि कारबाही गर्नुपर्ने, पोस्टमार्टम गलत बनाउने चिकित्सकमाथि कारबाही गर्नुपर्ने, जाहेरी दर्तामा निरुत्साहित गर्ने सरकारी वकिललाई कारबाही गर्नुपर्ने र लामो समय धर्ना बसेका पीडित परिवारमा शारीरिक अस्वस्थता र आर्थिक क्षति भएकाले क्षतिपूर्तिको व्यवस्था गरिनुपर्ने माग छन् ।