११ उत्कृष्ट महिला सहकारी पुरस्कृत

चैत ८, काठमाडौं । प्रदेश नं ३ सरकार, सामाजिक विकास मन्त्रालयले ११ उत्कृष्ट महिला सहकारीलाई सम्मान तथा पुरस्कार वितरण गरेको छ । 

सो मन्त्रालयले यहाँ आज एक समारोहको आयोजना गरी गुराँस महिला बचत तथा ऋण सहकारी संस्था लिमिटेड सिन्धुली, मिलिजुली महिला बचत तथा ऋण सहकारी धादिङ, कालिकास्थान महिला बचत तथा ऋण सहकारी रसुवा, गोठाटार महिला बचत तथा ऋण सहकारी काठमाडौँ, त्रिपुरा महिला बचत तथा ऋण सहकारी दोलखा र मनकामना महिला बहुउद्देश्यीय बचत तथा ऋण सहकारी भक्तपुरलाई सम्मान तथा पुरस्कार प्रदान गरेको हो । 

यस्तै प्रभात दिदीबहिनी बचत तथा ऋण सहकारी चितवन, महिला बचत तथा ऋण सहकारी सिन्धुली, पञ्चकन्या महिला बचत तथा ऋण सहकारी काभ्रेपलाञ्चोक, समाजसेवा जागृति महिला बचत तथा ऋण सहकारी रामेछाप र हिमाल महिला बचत तथा ऋण सहकारी मकवानपुरलाई पुरस्कार प्रदान गरिएको छ । पुरस्कारको राशि जनही रु दुई लाख छ । 

सोही अवसरमा प्रदेश नं ३ का सामाजिक विकासमन्त्री युवराज दुलालले सहकारी क्षेत्र राज्यको अर्थतन्त्रको मेरुदण्ड भएको हुँदा त्यसलाई व्यवस्थित गर्नुपर्नेमा जोड दिनुभयो । महिला, बालबालिका तथा ज्येष्ठ नागरिक मन्त्रालयका सहसचिव रुद्रादेवी शर्माले महिलाले सञ्चालन गरेको सहकारीले देशको अर्थतन्त्रमा पारेको सकारात्मक प्रभावबारे चर्चा गर्नुभएको थियो ।