स्तनपान र पोषण कक्ष स्थापना

फागुन २८, रुकुम (पूर्व) । सिस्ने गाउँपालिकाले आफ्नो कार्यालयमा स्तनपान र पोषण कक्ष निर्माण गरेको छ । महिला तथा बालबालिकाको पोषण स्थितिमा सुधार ल्याउन गाउँपालिकाले कार्यालयभित्र स्तनपान कक्ष निर्माण गरेको हो । 

कार्यालयमा काम गर्ने सुत्केरी कर्मचारी तथा कामको सिलसिलामा गाउँपालिकासम्म पुग्ने सुत्केरीले आफ्नो शिशुलाई सहजरुपमा स्तनपान गराउन सकून् भन्ने उद्देश्यले स्तनपान र पोषण कक्ष स्थापना गरिएको गाउँपालिकाले जनाएको छ । विशेष गरी गर्भवती महिला, सुत्केरी र दुई वर्षमुनिका शिशुलाई केन्द्रित गरेर स्तनपान र पोषण कक्ष स्थापना गरिएको हो । 

गाउँपालिका कार्यालयको एउटा कोठामा स्तनपान कक्ष र पोषण कक्ष स्थापना गरिएको गाउँपालिका अध्यक्ष कुमारी बरालले बताउनुभयो । पोषण कक्षमा गेँडागुडी, फलफूल राखिनुका साथै सन्देशमूलक जानकारी पनि राखिएको छ । पोषण कक्ष स्थापना भएपछि गाउँपालिकामा आउने सेवाग्राही आमा र बच्चा दुवैलाई सहयोग पुग्ने अध्यक्ष बरालले बताउनुभयो । 

स्तनपान कक्षमा बच्चा सुताउन शिशुखाट र स्तनपान गराउनका लागि आरामदायी सोफासेट राखिएको छ । स्तनपान प्रभावकारीसम्बन्धी सन्देशसहितका सामग्री पनि स्तनपान कक्षमा राखिएको छ । करीब रु एक लाखको लागतमा स्तनपान र पोषण कक्षको स्थापना गरिएको गाउँपालिकाले जनाएको छ । रु ७५ हजारको लागतमा स्तनपान कक्ष र रु २५ हजारमा पोषण कक्ष स्थापना गरिएको हो । 

‘हरेक बार खाना चार’ भन्ने नारालाई प्रत्येकको घरघरमा पु¥याउँछौँ, अध्यक्ष बरालले भन्नुभयो, “यहाँका महिला र बच्चाको स्वास्थ्य तथा पोषण स्थितिमा सुधार ल्याउँछौँ ।” सबैभन्दा पहिले आफ्नै कार्यालयमा स्तनपान कक्ष निर्माण गरेको सिस्ने गाउँपालिकाले विस्तारै सबै सरकारी कार्यालयमा पनि स्तनपान कक्ष निर्माण गर्ने योजना बनाएको उहाँको भनाइ छ ।