सरकारी अनुमति नलिएका औषधि पसल सिलबन्दी गर्दै, आजै तीन औषधि पसल सिलबन्दी

काठमाडौँ । जिल्ला जनस्वास्थ्य कार्यालयबाट अनुमति नलिइ सञ्चालन गरेकाले तीन वटा औषधि पसलमा सिलबन्दी गरिएको छ । सरकारले पछिल्लो समय अनुमति नलिइ संचालन गर्दै आइरहेका औषधि पसल सिलबन्धी गर्दै बन्द गराउँदै आएको छ ।

आपूर्ति व्यवस्थापन तथा उपभोक्ताहित संरक्षण विभागले गरेको विशेष बजार अनुगमनका क्रममा आज नयाँ बस्तीमा रहेका दुई वटा र बौद्धमा रहेको एक आषधि पसल सिलबन्दी गरेको हो । 

नयाँ बस्तीमा रहेको बौद्ध डेन्टल क्लिनिक प्रालि र रिद्धिसिद्धि पोलिक्लिनिक प्रालिले अनुमतिबिना सञ्चालन गरेकाले सिलबन्दी गरिएको हो भने बौद्धमा रहेको स्तूपा क्रान्ति टेन्टल प्रालिलाई गत साउन ४ गते अनुगमनका क्रममा दिएको निर्देशन पालना नगरेको भन्दै पुनः सिलबन्दी गरिएको हो। 

सिलबन्दी गरिएको यी तीनवटै औषधि पसललाई तीन दिनभित्र विभागमा आउन निर्देशन दिएको विभागका निर्देशक लक्ष्मण श्रेष्ठले जानकारी दिए । गोकर्णेश्वरमा रहेको मन्नु फार्मेसीले बिक्री बिल देखाउन नसकेको हुनाले आवश्यक कागजातसहित २४ घण्टाभित्र औषधि व्यवस्था विभागमा आउन निर्देशन दिइएको छ । 

त्यसैगरी सहिद गंगालाल राष्ट्रिय हृदयरोग केन्द्रको खाजा घरको अनुगमन गर्दा सडेको अवस्थामा पाँच किलो मासु नष्ट गरिएको छ । उक्त खाजा घर अत्यन्तै फोहर रहेकाले सरसफाइमा विशेष ध्यान दिन र तीन दिनभित्र विभागमा आउन निर्देशनसमेत दिएको छ । 

अनुगमनका क्रममा बलम्बु प्रेस हाउस बलम्बुबाट पनि सडेको १५ किलो कुखुराको मासु नष्ट गरी तीन दिनभित्र विभागमा आउन भनिएको छ । रासस