श्रावण सुरु भएसँगै चुरा र पोते बजारमा चहलपहल

 साउन १० , काठमाडौं । हिन्दू महिलाहरूका लागि विशेष महत्व राख्ने श्रावण महिना सुरु भएसँगै बजारमा चुरा र पोते किन्ने महिलाको भीड उल्लेखनीय रूपमा बढेको छ।
विशेषगरी हरियो चुरा, रातो पोते र विभिन्न डिजाइनका गहनाहरू किन्न महिलाहरू बजार धाउन थालेका छन्। काठमाडौं उपत्यकाका असन, इन्द्रचोक, लगनखेललगायतका मुख्य बजार क्षेत्रहरूमा बिहानदेखि नै ग्राहकको भीड देखिएको छ।
व्यापारीहरूका अनुसार श्रावण सुरु हुनुअघि नै चुरा–पोतेको माग बढ्न थालेको भए पनि पहिलो साउन सोमबार नजिकिँदै जाँदा बिक्री अझ तीव्र बनेको छ। “अहिले दैनिक व्यापार दोब्बर जस्तै भएको छ,” एक व्यापारीले बताए।
श्रावण महिनामा विवाहित महिलाहरूले हरियो चुरा र पोते लगाउने परम्परा छ, जसलाई सौभाग्य, प्रेम र समृद्धिको प्रतीक मानिन्छ। साथै, महिलाहरू मेहेन्दी लगाउने, व्रत बस्ने र भगवान शिवको पूजा गर्ने चलन पनि व्यापक छ।
यस वर्ष पनि युवतीदेखि वृद्ध महिलासम्मले उत्साहका साथ श्रावणको तयारी गरिरहेका छन्। बजारमा नयाँ डिजाइनका चुरा, आकर्षक पोते सेट तथा छुट अफरहरूले ग्राहकलाई अझ आकर्षित गरिरहेको छ।
श्रावण केवल धार्मिक आस्थासँग जोडिएको महिना मात्र नभई सांस्कृतिक पहिचान झल्काउने र आत्म–अभिव्यक्तिको अवसरको रूपमा पनि हेरिन्छ।