राष्ट्रपति भण्डारीद्वारा सांस्कृतिक कार्यक्रमको अवलोकन

काठमाडौँ । राष्ट्रपति विद्यादेवी भण्डारीले भारतको ७० औँ स्वतन्त्रता दिवसका अवसरमा नेपालस्थित भारतीय राजदूतावासको संस्कृति विभागले आज साँझ आर्मी अफिसर्स क्लबमा आयोजना गरेको सांस्कृतिक कार्यक्रमको अवलोकन गरेको छ । 

सो अवसरमा भारतको प्रसिद्ध व्याण्ड ‘अस्तिभा द व्याण्ड’ले सांस्कृतिक कार्यक्रम प्रस्तुत गरेको थियो । कार्यक्रममा राष्ट्रपति भण्डारीले व्याण्डका प्रसिद्ध गायक सलमान खानलगायत कलाकारलाई पुष्पगुछा प्रदान गरे । 

कार्यक्रममा नेपालका लागि भारतीय राजदूत मञ्जिवसिंह पुरीले नेपाल–भारत सम्बन्ध धेरै पुरानो रहेको भन्दै यसलाई अझ विकसित बनाएर लैजाने बताए । 

उनले भारतको स्वतन्त्रता दिवसको अवसरमा आयोजित सांस्कृतिक कार्यक्रममा नेपालको राष्ट्रपति आएर शोभा बढाइदिएको भन्दै उनलाई धन्यवाद व्यक्त गरे । रासस

---