योगमायाको शालिक अनावरण

फागुन २४, बनियानी । नेपालमा संस्थागत महिला आन्दोलनको नेतृत्वदायी भूमिका निर्वाह गर्नुहुने क्रान्तिकारी महिला नेत्री योगमाया न्यौपानेको शालिक आज झापाको कनकाई नगरपालिकामा अनावरण गरिएको छ । 

एक सय नवौँ अन्तर्राष्ट्रिय नारी दिवसको अवसरमा कनकाई–३ मा निर्मित योगमायाको अर्धकदको शालिक झापा क्षेत्र नं २ का सांसद पवित्रा खरेलले अनावरण गर्नुभएको हो । सांसद खरेलले ७७ वर्ष पहिले महिलामुक्तिका लागि योगमायाले थालेको आन्दोलनबाट महिलामुक्ति र समानताका लागि देशमा अवसर प्राप्त भएको बताउनुभयो । शालिक निर्माणमा कनकाई नगरपालिकाले रु १८ लाख, कनकाई सामुदायिक वनले रु ५१ हजार र स्थानीयवासी तुलाराज बस्नेतले रु ५० हजार सहयोग गरेको योगमाया शालिक निर्माण समितिका अध्यक्ष शर्मिला कुँवरले जानकारी दिनुभयो । अर्धकदको शालिक ११ फिट अग्लो छ । 

नेत्री योगमायाले राणा शासनताका महिला हकअधिकारका पक्षमा सङ्घर्ष गरेको कनकाई नगरपालिकाका उपप्रमुख मञ्जु प्रसाईंले बताउनुभयो । आन्दोलनका क्रममा १९९८ सालमा योगमायाको नेतृत्वमा ६८ महिलाले अरुण नदीमा हाम फालेर जलसमाधि लिएको इतिहास रहेको उपप्रमुख प्रसाईंले बताउनुभयो । “योगमाया महिलाको पक्षमा जीवन आहूति गर्ने सशक्त महिला हुनुहुन्थ्यो”, उहाँले भन्नुभयो, “उहाँको योगदानको सम्मान र सम्झनाका लागि शालिक निर्माण गरिएको हो ।” 

शालिक निर्माण गरिएको स्थानलाई ‘योगमाया चोक’ नामकरण गरिएको छ । कार्यक्रममा सांसद धर्मशीला चापागाईं, अम्बिका राजवंशी र सरिता प्रसाईंलाई सम्मान गरिएको थियो । प्रदेशसभा सदस्य हीरा थापा, पूर्वसांसद प्रेम गिरी, नगरप्रमुख राजेन्द्र पोखरेललगायतले शुभकामना मन्तव्य राख्नुभएको थियो ।