मानव बेचविखन अन्त्य गर्न एकजुट भएर लागौं: सभामुख ओनसरी घर्ती

भदौ २०, काठमाडौं । सभामुख ओनसरी घर्तीमगरले मानव बेचबिखन तथा ओसारपसार अन्त्य गर्न सवै एकजुट भएर लाग्नुपर्ने बताउनुभएको छ ।

‘अबको गन्तव्यः मानव बेचबिखनको अन्त्य’ नाराका साथ मानव बेचबिखन तथा ओसारपसार बिरुद्घको एघारांै राष्ट्रिय दिवसलाई मंगलबार राजधानीमा सम्बोधन गदै सभामुख घर्तीले भन्नुभयो ‘मानव बेचबिखनका तथा ओसारपसार बिरुद्घ सबै एकजुट भएर लागेमा सकारात्मक परिवर्तन अवश्य नै आउने छ । त्यसैले यसको अन्त्यका लागि एकजुट भएर लागौं ।’

सभामुख घर्तीले मानव बेचबिखन तथा ओसारपसार गम्भिर अपराध भएकाले यसको अन्त्यका लागि सबै सचेत र हातेमालो गरी अगाडी बढ्न अपिल गर्नुभयो । ‘यो गम्भिर अपराध हो, यसको अन्त्यका लागि सचेत बनौं र हातेमालो गरेर अगाडी बढौं । यो सम्भव छ ।’ सभामुख घर्तीले भन्नुभयो ।

२१ औं शताब्दीमा पनि मानव बेचबिखन तथा ओसापसार सम्बन्धी बनेको कानुन कार्यान्वयन नहुँदा बेचबिखन भैरहेको उहाँले बताउनुभयो । यो नेपालीहरुका लागि लज्जास्पद कुरा भएको भन्दै उहाँले मानव वेचविखन रोक्न राज्यका सबै निकायले कानुन कार्यान्वयन गर्न आहवान समेत गर्नुभयो ।

उहाँले सुचना प्रविधिको विकाससँगै मानव बेचबिखनको स्वरुप फेरिदै गएको यसलाई रोक्न चुनौती पनि रहेको बताउनुभयो । महिला, बालबालिका तथा समाज कल्याण मन्त्री आशा कोइरालाले विगतमा प्रत्येक्ष रुपमा महिलाहरु बेचबिखनको शिकार हुने गरेकोमा अहिले स्वरुपमा परिवर्तन आएको बताउनुभयो ।

मन्त्री कोइरालाले चेतनाको अभाव, गरिबी, असमानता, विभेद, बेरोजगारी जस्ता कारणले मानव बेचबिखन तथा ओसारपसार हुने गरेको र यि सवै समस्या हल गर्न सरकारको एक्लो प्रयासले मात्र सम्भव नहुने भन्दै सबैलाई सहकार्यका लागि आग्रह गर्नुभयो ।

दिवसको अवसरमा मंगलवार बिहान राष्ट्रिय सभा गृहबाट प्रभातफेरि गरेर प्रज्ञा प्रतिष्ठान कमलादी पुगेर विशेष कार्यक्रम गरिएको थियो ।