महिला कामदारका लागि इजरायल खुल्यो

काठमाडौं। थोरै संख्यामा भए पनि इजरायल सरकारले लामो समयपछि केयरगिभरका रूपमा कामदारको माग गरेको छ । नेपाल तथा इजरायल सरकारबीच भएको पछिल्लो सम्झौताअनुसार हाललाई ६० जना केयर गिभरको माग गरिएको वैदेशिक रोजगार विभागले जनाएको छ । दुई देशबीच भएको सम्झौताअनुसार ती कामदारले त्यहाँ ५१ महिना काम गर्न पाउनेछन् । केयर गिभरका लागि ८० प्रतिशत महिला तथा २० प्रतिशत पुरुष माग गरिएको छ । 

केयर गिभरका रूपमा इजरायल गएकाहरूको प्रमुख जिम्मेवारी वृद्ध, अपाङ्ग तथा असक्तहरूको स्याहार–सम्भार एवं रेखदेख गर्नु हो । मिजासिला र भरपर्दा भएको हुँदा केयरगिभरका लागि नेपाली कामदार इजरायलीहरूको रोजाइमा पर्ने गरेका छन् । महिलाहरूका लागि आकर्षक गन्तव्य बन्दै गएको इजरायलमा मासिक १ लाख रुपैयाँभन्दा बढी कमाइ हुने त्यहाँ काम गरेर फर्किएकाहरू बताउँछन्, तर अबैध बाटोबाट गएका कमदारको हकमा भने राम्रो हुन्छ भन्ने छैन ।

सरकारसँग सम्झौता भएअनुसार गएकाहरूको जिम्मा त्यहाँको सरकारले लिने हुँदा आम्दानी राम्रो हुने ग्यारेन्टी हुन्छ । अहिले पठाइने कामदारलाई सीधै वैदेशिक रोजगार विभाग तथा इजरायल सरकारले छनोट गर्ने हुँदा दलालको कुनै भूमिका हुँदैन । इजरायल जान चाहने महिला तथा पुरुष स्वयं विभागमा उपस्थित भएर आवेदन दिनुपर्ने विभागकी सूचना अधिकारी रमा भट्टराई बताउँछिन् । कुनै पनि दलालको प्रलोभनमा पर्नबाट सचेत रहन पनि उनी सुझाव दिन्छिन् । ‘अहिले कामदार पठाउने सम्झौता इजरायल सरकार र नेपाल सरकारबीच सीधा भएको हो,’ भट्टराई भन्छिन्— ‘दलालले म मिलाइदिन्छु भन्दै फकाए भने पनि त्यसमा विश्वास नगर्नुहोला, त्यस्ता मानिस फेला परे प्रहरी प्रशासनलाई जिम्मा लगाइदिए हुन्छ ।’

कसरी भर्ने फारम ?
विभागले हाल खुलाएको कोटाका लागि आगामी चैत ९ गतेदेखि आवेदन लिइनेछ । इच्छुक व्यक्तिले स्वयं वैदेशिक रोजगार विभागको कार्यालयमा उपस्थित भएर फारम बुझाउनुपर्नेछ । आवेदन फारम विभागको वेबसाइड धधध।मयाभ।नयख।लउ बाट निकाल्न सकिन्छ । इच्छुक उम्मेदवारले छनौट प्रक्रियाका लागि आवश्यक स्वास्थ्य परीक्षण, बिमा शुल्क, कल्याणकारी कोष, प्रहरी प्रतिवेदन तथा हवाई टिकटसम्बन्धी खर्च आफंैले बेहोर्नुपर्नेछ ।
 

कस्ता व्यक्ति जान पाउँदैनन्

• इजरायलमा काम गरेर फर्किएका ।
• पति–पत्नी बुबा, आमा तथा बालबालिका इजरायलमै  भएका ।
• शारीरिक तथा मानसिक रूपमा अस्वस्थ, क्षयरोग, हेपाटाइटिस सिफलिस, एड्सजस्ता रोग नलागेको ।

योग्यता

• २५ वर्ष पूरा भै ४५ वर्ष ननाघेको 
• कम्तीमा एसएलसी उत्तीर्ण 
• इन्टरमिडिएट तहको अंग्रेजी भाषाको ज्ञान–सीप हुनुपर्ने 
• उचाइ कम्तीमा ५ फिट र तौल ४५ किलोग्राम
• रोजगार प्रवद्र्धन बोर्डबाट वा मान्यताप्राप्त तथा वैदेशिक रोजगार विभागमा सूचीकृत संस्थाबाट कम्तीमा तीन महिनाको केयरगिभर तालिम वा मान्यताप्राप्त निकायबाट प्राक्टिकल नर्सिङ सफलतापूर्वक सम्पन्न गरी प्रमाणपत्र प्राप्त गरेको हुनुपर्ने ।