भदौ २४, पोखरा । पोखरा लेखनाथ महानगरपालिकाको पृथ्वीचोकस्थित बसपार्कमा सहारा क्लबद्वारा सञ्चालित सार्वजनिक शौचालय २९ लाखको लागतमा मर्मतपछि सञ्चालनमा आएको छ ।
सुविधासम्पन्न सो शौचालय महानगरपालिकाको करिब १४ लाख चार हजार, सहारा क्लबको १३ लाख ४९ हजार, बाबा फाउण्डेशन नेपालको ६० हजार, बिबी निर्माण सेवा चाउथेको ५५ हजार ५५५ र गुरुङ स्टोन सप्लायर्सको ३० हजारको आर्थिक सहयोगमा मर्मत गरी पुनः सञ्चालनमा ल्याइएको हो ।
व्यस्त बजार पृथ्वीचोकमा सर्वसाधारलाई सुविधा पुर्याउने उद्देश्यका साथ निर्माण गरी सञ्चालनमा ल्याइएको अपांगतामैत्री सो शौचालयमा स्नानगृह पनि छ । एकै पटकमा २२ जनाले दिसापिसाब गर्ने सुविधा रहेको क्लबका अध्यक्ष वीरभद्र आचार्यले बताए ।
महिला र पुरुषका लागि छुट्टाछुट्टै तथा अपांगता भएकाका लागि एउटा कक्षको व्यवस्था गरिएको सो शौचालय प्रवेशमा प्रतिव्यक्ति पाँच तथा अपांगता भएको व्यक्तिको हकमा निःशुल्क गरिएको महासचिव केशवराज बरालले जानकारी दिए ।