फेसन डिजाइनमा अव्वल प्रेमदेव नाममा भन्दा काममा सचेत

काठमाडौं। नेपाली फेसन डिजाइन क्षेत्रमा डिजाइनर प्रेमदेवको यात्रा प्रारम्भ भएको १२ वर्ष भयो । यसबिच उनले धेरै प्रकारका  उत्तारचढावको सामना गरे पनि आफूले रुचाएको पेसाबाट कहिल्यै नथाकी अनवरत रूपमा फेसन डिजाइनमा लाग्ने नेपालका सफल डिजाइनर मध्येका एक हुन्–डिजाइनर प्रेमदेव ।  आइसी फेसन कलेजबाट नै डिजाइनमा डिप्लोमासम्मको कोर्स  पूरा गरेका  यी डिजाइनर अहिले नेपालमा चलेका उच्चकोटीका सेलिब्रेटीलगायतका ड्ेरस डिजाइनमा व्यस्त छन् ।

खासमा उनी यो क्षेत्रमा हाम फाल्दाताका साडी पसलमा काम गर्थे । त्यतिबेला उनको जीवनमा एक प्रकारको सफल जीवनको सपना बोक्न सिकाउने एक पात्र हुन्–डा. बबी श्रेष्ठ । उनकै सल्लाह र सहयोगका कारण उनले डिजाइन कोर्स गर्ने मानसिकता बनाउन सके ।  फलस्वरूप आज देशमा हुने विभिन्न फेसन डिजाइनका भव्य समारोहरूमा पनि उनले डिजाइन गरेका पहिरन देख्न सकिन्छ । कुरा भन्दा बढी काममा विश्वास राख्ने डिजाइनर प्रेमदेवले आफ्नो  खुबी तथा कला विभिन्न ट्यालेन्ट शोहरूमा प्रस्तुत गरिसकेका छन् । हालसम्म उनले ४ वटा फेसन विक, विभिन्न फेसन शोमा आफ्नो डिजाइन कला प्रस्तुत गर्न भ्याइसकेका छन् ।

अहिलेका जल्दाबल्दा र लोकप्रिय डिजाइनर प्रेमदेव आफ्नो सीप र क्षमता अरुलाई सिकाउन पाउँदा र आफूले डिजाइन गरेको पहिरनमा अरु रमाउँदा आफू काममा सफल भएको अनुभूत गर्छन् । यसैगरी नेपालमा देखिएको बेरोजगार समस्यामा पनि आफ्नो क्षमताले भ्याएसम्म युवायुवतीलाई रोजगार पनि प्रदान गर्न सकेकोमा उनी झनै खुसी हुन्छन् ।

‘४ हजार तलबबाट मैले काम गर्न थालेको थिएँ । डिजाइनर प्रेमदेव विगत सम्झिँदै भन्छन्, न्यूरोड मख्खनटोलस्थित दुलही साडी शोरुममा काम गर्दागर्दै मेरो भविष्यको बाटो देखाइदिने कलाकार शिव श्रेष्ठकी छोरी डाक्टर बबी श्रेष्ठको साडी किन्न आउँदा उनको नजर ममाथि पर्‍यो । डिजाइन कोर्स गर्न सल्लाह दिने उनै बबीको प्रेरणाले आज मलाई एक सफल डिजाइनर बनायो।’

प्लस टु भारतबाट पूरा गरेका डिजाइनर प्रेमदेवले सन् २००९ मा नेपालमा नै फेसन डिजाइन कोर्स गरे । त्यसयता उनी निरन्तर डिजाइन पेसामा आबद्ध छन् । तर त्यतिबेला कोर्स पूरा गरे पनि उनी खासै खुसी हुन भने सकेका थिएनन् । जब उनमा डिजाइनको प्यासन  जाग्यो त्यसयता उनले एक पल पनि गुनासो गर्ने अवस्था आएन ।

प्रेमदेव आफैमा एक पोख्त डिजाइनर हुन । आफू जस्तै अब आउने नयाँ पुस्तालाई पनि बढी नक्कल नगरी कोर्स पूरा गरेर उत्कट इच्छाका साथ यो क्षेत्रमा प्रवेश गर्न उनी सल्लाह दिन्छन् । उनी अहिलेका नयाँ डिजाइनरहरू सिर्जना गर्न इच्छा नगर्ने तर बलिउड डिजाइनको कपी क्याट गर्न भने सक्रिय भएको गुनासो पोख्छन् । नेपाली फेसन डिजाइनमा देखिएको यो कल्चरको विरुद्धमा आवाज उठाउने डिजाइनर प्रेमदेव  अहिलेको मागलाई  हेरेर नेपालीपन झल्कने डिजाइनमा बढी जोड दिन सबै डिजाइनरलाई आग्रह गर्छन् ।

यसो हेर्दा सहज देखिएपनि डिजाइन गर्नु आफैमा कठिनाइ हुने  डिजाइन क्षेत्र निरन्तरको मेहनत र सिपले जो कोहीपनि अब्वल डिजाइन बन्न सक्ने डिजाइन प्रेमदेवको दावी गर्छन् । यद्यपि, कयौं युवायुवती डिजाइन बन्ने सपना बोकेर यस क्षेत्रमा प्रवेश गरे पनि कहिलेकाहीँ  अरूको लहैलहैमा लागेर छोटो समय काम गर्ने र पलायन हुने डिजाइनरका कारण स्थापित डिजाइनरलाई ग्राहकले सवाल नउठाउन् भन्ने उनलाई लाग्छ । डिजाइन पेसामा नाम, काम र दाम सबै छ । तर यी सबै कुरा प्राप्त गर्न  मेहनत, निरन्तरता र आफ्नो कामप्रति विश्वास हुनुपर्ने डिजाइनर प्रेमदेवको भनाइ छ ।  

डिजाइन क्षेत्रलाई नै जीवनको प्रमुख लक्ष्य बनाएका डिजाइनर प्रेमदेव पेसालाई निरन्तरता दिइ आधुनिक अर्थात् परिवर्तित शैली अपनाएर नेपालको फेसन जगत्लाई अन्तर्राष्ट्रिय जगत्को फेसनसँग प्रतिस्पर्धा गर्न लायक बनाउने सकिने तर्क गर्छन् । कसरी हुन्छ बाँचुन्जेल यो पेसालाई सम्मान गर्दै टिपाज क्रियसनका डिजाइन्लाई आम नेपाली महिलाहरूको नजरमा पर्न सकुन भन्नका लागि उनी दैनिकजसो कुनैन कुनै ट्रिक्स अपनाउँछन् । यसका लागि उनी निकट भविष्यमा नै टिपाज क्रियसनको फ्रेन्चाइज अर्थात् शाखा नेपालका मुख्य सहरमा बिस्तार गर्ने तयारीमा समेत जुटेको बताउँछन् ।