जाडोमा हुडको मज्जा

एक पन्थ दुई काज भने झै काठमाडौंको कठ्यांग्रिदो जाडो छल्न अहिले धेरै युवायुवतीको पहिलो रोजाइमा पर्न थालेको छ– हुड । हुडले शरीर ढाक्ने मात्र नभै टाउको छोप्ने टोपी तथा हात छोप्ने पञ्जाको काम पनि गर्छ । टोपीसँगै अघिल्लतिर गोजी पनि भएकाले चिसोमा हात लुकाउन पाइने हुँदा अधिकांशले हुडको न्यानोपनको मज्जा लिएको पाइन्छ । कलेज तथा कार्यस्थलमा समेत हुड लगाउने युवायुवतीहरूको संंख्या बाक्लो देखिन्छ । यति मात्र होइन, चिसो वातावरणमा काम गर्नै पर्ने बाध्यता तथा लामो यात्रा गरेर कार्यस्थलमा पुग्नुपर्ने अनिवार्यतालाई मध्यनजर गर्दै पहिरन छनोट गर्नुपर्ने हुन्छ । त्यसैले व्यस्त दैनिकी भएकाहरूका लागि हुड पहिलो प्राथमिकतामा पर्न थालेको छ । जाडोमा बाक्लो ज्याकेट वा लुगा खप्ट्याएर लगाउनुको विकल्प हुँदैन, त्यसैले पहिरनको मामिलामा जाडोमा पनि हल्का हुन खोज्नेहरूबीच हुड लोकप्रिय भएको हो ।

केही वर्षयता नेपालमा पनि हुडको फेसन निकै फस्टाएको छ । हुड विशेषगरी, युवापुस्ताको मन तान्न हुड सफल छ । बजारमा न्यानोपन दिने थरीथरीका कोट, ज्याकेट तथा बाक्ला पहिरनको कमी छैन । तथापि, यो वर्षको जाडोमा हुडको जस्तो माग अन्य पहिरनको नभएको व्यवसायीहरू बताउँछन् । अहिले हुडले नै न्याना पहिरनको बजारको उल्लेख्य हिस्सा ओगटेको व्यवसायीहरू दाबी गर्छन् । बजारमा अहिले सामान्यदेखि महँगो मूल्यसम्मका विभिन्न गुणस्तरका हुड बजारमा उपलब्ध छन् । सामान्य युवायुवतीहरू आफूलाई आवश्यक पर्ने र आफ्नो क्षमताअनुसारका हुडप्रति आकर्षित भएको पाइन्छ ।

सेलिब्रेटी तथा ब्रान्डेड पहिरनमात्र रुचाउने वर्गका मानिसहरू पनि यतिबेला आफूलाई जाडोबाट जोगाउन हुडप्रति नै आकर्षित भएको पाइन्छ । अहिले बजारमा महिला/पुरुष, किशोर/किशोरीदेखि लिएर साना शिशुहरूका लागि पनि विभिन्न आकार, रंग तथा डिजाइनका हुड खरिद गर्न सकिन्छ ।

युवायुवती दुवैका लागि फिट हुने डिजाइनको हुड नेपाल भित्रिएको आधा दशकभन्दा बढी भैसकेको छ तर यसले गत वर्षदेखि मात्र फेसनका रूपमा लोकप्रियता पाउन थालेको हो । मलदेखि फुटपाथसम्म जताततै सहजै किन्न सकिने र हेर्दा बाक्लो, लगाउँदा न्यानो, विभिन्न रंग तथा डिजाइनमा उपलब्ध हुने हुडको अहिलेको लोकप्रियता लोभलाग्दो छ । हुडको यो लोकप्रियता यो जाडोभरि नै कायम रहने फेसन विश्लेषकहरू बताउँछन् ।