कुसुण्डा बालिकालाई सहयोग

जेठ १६, दमौली ।अति लोपोन्मुख जातिका रुपमा रहेको एक कुसुण्डा परिवारकी बालिकालाई नेपाली काङ्ग्रेसका केन्द्रीय सदस्य एवं पूर्वमन्त्री नवीन्द्रराज जोशीले आर्थिक सहयोग गर्नुभएको छ । तनहुँको ब्यास नगरपालिका–१० डिहीगाउँ निवासी सीमान्त कुसुण्डाको उपचारका लागि नेता जोशीले रु दश हजार सहयोग गर्नुभएको हो ।उक्त रकम नेता जोशीले आज घरमै पुगेर उनकी आमा इन्द्रमायालाई हस्तान्तरण गर्दै  सीमान्तको उपचारका लागि आर्थिक अभाव भएको थाहा पाएपछि केही सहयोग गरिएको बताउनुभयो । उहाँले उनको  उच्च शिक्षा अध्ययनका लागि आफूले सहयोग गर्ने प्रतिबद्धतासमेत जनाउनुभयो । “एसइईसम्म पढाउनका लागि सम्पूर्ण व्यवस्था भइसकेको रहेछ, उच्च शिक्षाको पढाइका लागि  सम्पूर्ण जिम्मेवारी मैले नै लिने प्रतिबद्धता जनाउँछु”, उहाँले भन्नुभयो।  

सोही वडाको शतिश इङ्लिस बोर्डिङ स्कूलमा ४ कक्षामा अध्ययनरत सीमान्तको स्वास्थ्य र पढाइका लागि आमाको चिन्ता विषयमा राससले पटक–पटक समाचार प्रकाशित गरेको थियो । सीमान्तको एसइईसम्मको पढाइ खर्च वडा नं १० ले लिने प्रतिबद्धता गरेको  यसअघि नै वडाध्यक्ष तुलसीराम सापकोटाले जनाउनुभएको थियो । त्यस्तै उक्त बोर्डिङ स्कूलले समेत सीमान्तको मासिक शुल्कमा सहयोग गर्ने प्रतिबद्धता जनाएको थियो । साभ नेपालले उनकोे शिक्षा र स्वास्थ्यका लागि सहयोग अभियान सञ्चालन गरी एक वर्षका लागि पुग्ने शैक्षिक सामग्री उपलब्ध गराएको थियो ।