छोरीकाे बिहे १६ वर्षभित्रै गर्नुपर्छ सांसद करिमा

माघ १८, काठमाडौं । जनकपुरधाम । प्रदेश २ की सांसद करिमा बेगमले कानूनको आलोचना गर्नु भएको छ । बिहीबारको प्रदेश सभा बैठकमा बोल्दै संघीय सरकारको पूर्वमन्त्रीसमेत रहनु भएको बेगमले २० वर्ष पुगेपछि मात्रै छोरीको विवाह गर्नुपर्ने कानून ल्याएर गल्ती भएको बताउनु भएको हो ।

छोरीहरुको विवाहा १६ वर्षमा गर्दा उचित हुने उहाँको तर्क छ । छोरीहरुको विवाहको लागि २० वर्षसम्म कुर्दा छोरीहरु बिग्रन सक्ने समते उहाँले बताउनु भयो । उहाँले बैठकमा बोल्दै भन्नु भयो, ‘छोरीहरूको बिहेको लागि २० वर्षसम्म प्रतीक्षा गरियो भने बिग्रने डर भएकोले १६ वर्षभित्रै बिहे गर्नु उपयुक्त हुनेछ।’

छोरीको विवाह २० वर्षपछि मात्रै गर्न पाउने कानुनी व्यवस्थाले गर्दा भागी विवाह गर्नेको सङ्ख्य बढ्दै गएको उहाँले बताउनु भयो । आमाबुवाको इज्जत जोगाउन पनि कमै उमेरमा विवाह गर्नु उपयुक्त हुने उहाँले जिकिर गर्नुभयो ।

उहाँले प्रदेश २ ले छोरीहरूको सामूहिक विवाहको आयोजना गर्नुपर्ने सुझाव समते दिनुभयो । सामुहिक विवाहले गरिब आमाबुवालाई राहत मिल्ने उहाँको तर्क छ ।

यसअघि कृषि राज्यमन्त्री हुँदा राम्रो गाडी नदिएको भन्दै पर्साका तत्कालीन सीडीओ दुर्गाप्रसाद भण्डारीलाई थप्पड हानेर चर्चामा आउनु भएको थियो । पहिलो संविधानसभा निर्वाचन ९२०६४० सालमा पर्सा–१ बट चुनाव जितेकी करिमा बेगम ०६६ मा कृषि राज्यमन्त्री बनिनु भएको थियो ।

त्यस्तै बलात्कारबारे पनि उहाँले विवादास्पद अभिव्यक्ति दिनुभएको थियो । युवतीले छोटो कपडा लगाएका कारण बलात्कारका घटना बढेको उहाँले बताउनु भएको थियो। त्यसपछि पनि उहाँ चर्चामा आउनु भएको थियो ।

समानुपातिकतर्फबाट प्रदेशसभा सांसद बनिनु भएको बेगम सङ्घीय समाजवादी फोरमको केन्द्रीय सदस्यसमेत हुनुहुन्छ ।भदौ १ देखि लागू नयाँ पारिवारिक कानूनले विवाह गर्न पाउने उमेर हद २० वर्ष तोकेको छ ।