कुखुरापालन व्यवसायबाट राम्रो आम्दानी

–विमलबहादुर विष्ट 

माघ १७,  डोटी  । लगन र मेहनतका साथ व्यवसाय गरे अपाङ्ता भएका व्यक्तिले पनि राम्रो आम्दानी गर्न सक्छन् भन्ने उदाहरण देखाएको छ, डोटी दीपायल सिलगढी नगरपालिका–४ कुमालीकोटकी ३५ वर्षीया सारदा विष्ट । 

विगत एक वर्षदेखि शुरु गरेको कुखुरापालन व्यवसायबाट उनले मासिक रु १५ देखि २० हजारसम्म आम्दानी गर्ने गर्छ । त्यसैको आम्दानीबाट उनले आफ्नो एक छोरीलाई सुजंङ बोर्डिङ स्कूलमा पढाउनुका साथै घर खर्च पनि राम्रैसँग धान्नुभएको छ । 

वर्षौं पहिले दुर्घटनामा पर्दा उहाँको दाहिने हात काटिएको थियो । अपाङ्ग सेवा सङ्घ सिलगढी डोटीले दश हजारका उन्नत जातका कुखुराका चल्ला तथा खोर निर्माणका लागि रु दश हजार आर्थिक सहयोग गरेपछि आफूले उक्त व्यवसाय शुरु गरेको विष्टले बताउनुभयो । 

“पहिले म घाँस दाउरा काट्न र खेतबारीकै काममा सीमित थिए, अपाङ्ग सेवा सङ्घले कुखुराका चल्ला र खोर बनाउन रकम दियो”, उहाँले भन्नुभयो, “अहिले व्यवसाय शुरु गरे राम्रै आम्दानी भएको छ ।” हिजोआज कुखुरा किन्नेहरु उहाँकै फार्ममा पुग्ने गरेका छन् । उहाँको फार्ममा लोकल तथा उन्नत जातका कुखुरासमेत भएका कारण ग्राहक खोज्नुपर्ने समस्या नभएको उहाँले बताउनुभयो । 

उहाँले भन्नुभयो, “चिसो मौसम शुरु भएको छ, लोकल कुखुराको सुप खान ग्राहक बढी रुचाउने भएकाले कुखुरा किन्न फार्ममै आउन थालेका छन् ।” उहाँले लोकल कुखुरा जिउँदो प्रतिकिलो रु ६०० का दरले बिक्री गर्दै आउनुभएको छ । 

अन्य व्यवसायभन्दा कुखुरापालन व्यवसाय सस्तो र सुलभ भएको भन्दै उहाँले भन्नुभयो, “अन्य व्यवसायभन्दा कुखुरापालन व्यवसाय अप्ठेरो र झण्झटिलो छैन, अलि कति मेहनत गरे राम्रै आम्दानी हुने गर्छ, कुखुरा मरे पनि काम लाग्न, जिउँदो काम लाग्ने व्यवसाय यही नै हो, यसमा घाटा हुँदैन ।” 

उहाँको फार्ममा कुखुराका चल्लासमेत उत्पादन हुँदै आएको छ । जिल्लामा रहेका करीब तीन दजर्नभन्दा बढी अपाङ्गता भएका व्यक्तिका घर परिवारलाई आयआर्जन गर्न सिलाइ मेशिन, कुखुरापालन व्यवसाय, बाख्रापालन तथा घुम्तीकोषका लागि आर्थिक सहयोग दिँदै आएको अपाङ्ग सेवा सङ्घ डोटीकी कार्यक्रम संयोजक सीता राईमाझीले बताउनुभयो । उहाँले भन्नुभयो, “गाउँघरमा रहेका आपङ्गता भएका व्यक्तिले अवसर र सीप पाए सपाङ्गता भएका व्यक्तिसरह काम गर्न सक्छन् भन्ने उद्देश्यले हामीले उहाँहरुलाई विभिन्न सीपमूलक तालीम, मेशिन र व्यवसायका लागि आर्थिक सहयोग दिँदै आएका छौँ ।”