नुरजहा खातुन मृत्यु प्रकरण:अपरेसनमा संलग्न महरा पक्राउ

कार्तिक २२, काठमाडौं । जथाभाबी पाठेघरको अपरेसन गर्दा रौतहटको बिर्तामा स्थित इमर्जेन्सी जन सेवा हस्पिटलमा  बिरामी महिलाको मृत्यु भएपछि अपरेसनमा संलग्न इन्द्रदेव महरालाई  इलाका प्रहरी कार्यालय गरुडाबाट खटिएको टोलीले महरालाई सर्लाहीको हराकठवा बजारबाट मंगलबार राति पक्राउ गरेको थियो।

पक्राउ परेका महरा अहिले इलाका प्रहरी कार्यालय गरुडाका नियन्त्रणमा रहेको डिएसपी ओम प्रकाश खनालले जानकारी दिए । महरा बिर्ता स्थित झोले अस्पताल जस्तै सर्लाही हरकठवा बजारमा श्रीराम अस्पताल सञ्चालन गरेको र त्यहीँ बाट पक्राउ गरिएको डिएसपी खनालले जानकारी दिए। अपरेसन गर्ने मुख्य डाक्टर तथा अस्पताल सञ्चालक गरुडा ८ का राजेन्द्र यादव भने फरार रहेका  छन्।

डाक्टरको चरम लापरबाहीका कारण बिरामी महिला चन्द्रपुर नगरपालिका ७ बनबौहरीका नुर्जहान खातुनको ज्यान गएको पीडित परिवारले बताएको छ।

पेट दुख्ने समस्या हुँदा खातुनलाई उक्त अस्पतालमा चेकजाँच गराउँदा डाक्टरले पाठेघरको अपरेसन गर्नुपर्ने बताएका थिए। डाक्टरको सुझाव अनुसार सोमबार बिरामी खातुनलाई ईमरजेन्सी जनसेवा हस्पिटल बिर्तामा अप्रेसन गराउन लगिएको थियो । सोमबार साँझ डाक्टरले खातुनको पाठेघरको अपरेसन गरेपछि अत्यधिक रक्तस्राव भएर उनी अत्यन्तै सिकिस्त भएको जिल्ला प्रहरी कार्यालय रौतहटको सूचनामा उल्लेख  छ।

अचेत भएकी बिरामी खातुनलाई डाक्टरको सल्लाह अनुसार थप उपचारको लागि एम्बुलेन्स बाट वीरगंज स्थित मेट्रो सिटी अस्पतालमा लैजाँदा सोमबार राति डाक्टरले मृत घोषणा गरेको उनका श्रीमान इब्राहिम सिद्विकीले बताए। 

घटनापछि हस्पिटलका सञ्चालक राजेन्द्र यादव र अपरेसन गर्ने डाक्टर हस्पिटल बन्द गरेर फरार भएका थिए । 

अस्पताल सञ्चालक पैसाको लोभमा परेर सीमावर्ती भारतीय बजारबाट डाक्टरका सहयोगीलाई बोलाएर विभिन्न प्रकारको अपरेसन गराउँदै आएको पीडित परिवारको आरोप रहेको छ। बिरामीलाई बेहोस गर्ने दक्ष जनशक्ति बिना, सुविधा सम्पन्न अपरेसन कक्षबिना पाठेघरको अपरेसन गरेकाले खातुनको मृत्यु भएको पीडित परिवारको भनाई छ।