राष्ट्रिय विधि विज्ञान प्रयोगशाला विधेयक समितिबाट सर्वसम्मत पारित

असोज ८, काठमाडौं । राष्ट्रिय विधि विज्ञान प्रयोगशाला विधेयक, २०८१ संसदीय समितिबाट सर्वसम्मत रूपमा पारित भएको छ। शिक्षा, स्वास्थ्य तथा सूचना प्रविधि समितिको बैठकले विधेयक पारित गर्दै अब प्रतिनिधि सभामा पेस गर्ने बाटो खुला गरेको हो।

समितिमा विधेयकमाथि भएको छलफलपछि तयार पारिएको प्रतिवेदनलाई समितिले अनुमोदन गरेको हो। यसअघि समितिको सचिवालयले सम्बन्धित निकाय तथा कानून, न्याय तथा संसदीय मामिला मन्त्रालयसँग समन्वय गरी विधेयकको मस्यौदा प्रतिवेदन तयार गरेको थियो।

समितिको छलफलका क्रममा उठेका विषय तथा समितिका निष्कर्षलाई प्रतिवेदनमा समेटिएको जनाइएको छ। विधेयकमा नयाँ अध्याय र चारवटा दफा थप गरिएको तथा एउटा दफा हटाइएको विवरण यसअघि समितिमा पेस गरिएको मस्यौदा प्रतिवेदनमा उल्लेख थियो।

राष्ट्रिय सभाबाट विधेयकमाथि गरिएका संशोधनमध्ये समितिले यसअघि नै स्वीकार गरिसकेका विषयलाई पुनः प्रतिवेदनमा समावेश नगरिएको जनाइएको छ। तर समितिले राष्ट्रिय सभाका संशोधनमा थप परिवर्तन गरेको भए त्यस्ता विषयलाई भने प्रतिवेदनमा समेटिएको छ।

विधि विज्ञान प्रयोगशालासम्बन्धी कानुनी तथा संस्थागत व्यवस्था स्पष्ट गर्ने उद्देश्यले ल्याइएको विधेयक अब प्रतिनिधि सभाको प्रक्रियामा जानेछ। समितिबाट सर्वसम्मत रूपमा पारित भएपछि विधेयकलाई संसद्को आगामी प्रक्रियामा अघि बढाउने तयारी गरिएको छ।