पिताबाटै बलात्कार, आमाले साथ नदिए पनि नेपाली चेलीले भारतमा पाइन् न्याय

चैत १२ काठमाडौं ।  आफ्नै पिताबाट बलात्कृत भएकी एक नेपाली चेलीले भारतको अदालतबाट न्याय पाएकी छन् । पीडित किशोरीका पितालाई अदालतले आजीवन कारावासको सजाय सुनाएको छ ।
पीडित किशोरीका परिवार भारतको हैदरावादमा बस्दै आएको बताइएको छ । किशोरी र उनको परिवारको परिचय गोप्य राखिएपनि भारतीय सञ्चारमाध्यमले पीडित नेपाली रहेको जनाएका छन् ।
सन् २०२३ मा ती किशोरीलाई आफ्नै पिताले बलात्कार गरेका थिए । मुद्दा प्रक्रिया अघि बढाइएपछि पीडित किशोरीलाई आमाले समेत साथ नदिएको बताइएको छ ।

पोक्सो मामिलाको विशेष अदालतले किशोरीलाई हिम्मत नहारी कानुनी लडाइँ लडेकोमा ढाडससमेत दिएको छ ।भारतीय सञ्चारमाध्यमका अनुसार किशोरीका परिवार नेपालबाट हैदरावादमा पुगेर मजदुरी गर्दै आएको थियो । घरमा सुतिरहेको समयमा किशोरीलाई मादक पदार्थ सेवन गरेर आएका पिताले चक्कु देखाएर धम्की दिँदै बलात्कार गरेका थिए । 

आमालाई किशोरीले घटनाबारे जानकारी गराएपछि भोलिपल्ट आमाछोरी नै डोमलगुडा प्रहरी कार्यालयमा पुगेर उजुरी दिएका थिए । सोही आधारमा प्रहरीले आरोपितलाई गिरफ्तार गरेको थियो ।
मुद्दा प्रक्रिया अघि बढाइएपछि भने आमाले समेत किशोरीको साथ छाडेकी थिइन् । उनले अदालतमा आफ्नो बयान फेरेको बताइएको छ । तर, अदालतले ११ जना साक्षी, १४ प्रमाण र घटनासँग सम्बन्धित तीन विभिन्न सामग्रीका साथै पीडितकी आमाले उजुरीका समयमा दिएको बयानलाई समेत आधार मानेर आरोपितलाई दोषी ठहर गर्दै सजाय तोकेको हो ।