आत्मविश्वास र उद्देश्यको मञ्च बन्यो ‘मिसेस इन्डिया इन्टरनेशनल क्विन २०२६’

साउन १५ , काठमाडौ । भारतमा आयोजना गरिएको ‘मिसेस इन्डिया इन्टरनेशनल क्विन २०२६’ सफलतापूर्वक सम्पन्न भएको छ। प्रतियोगितामा अभिनेत्री नीलम कोठारी सोनी र आयोजक अंकिता सरोहाको उपस्थितिमा विजेताहरूलाई ताज पहिर्याइएको थियो।

यो प्रतियोगिता केवल सौन्दर्य प्रदर्शनमा सीमित नभई विवाहित महिलाको आत्मविश्वास, नेतृत्व क्षमता र व्यक्तिगत विकासलाई केन्द्रमा राखेर आयोजना गरिएको बताइएको छ। आयोजकका अनुसार यस मञ्चले महिलालाई आफ्नो पहिचान पुनः स्थापित गर्न र नयाँ सम्भावना खोज्न प्रेरित गर्ने उद्देश्य राखेको छ।
कार्यक्रममा विभिन्न पृष्ठभूमिका महिलाहरूको सहभागिता रहेको थियो, जसले आफ्ना अनुभव, प्रतिभा र संघर्षका कथामार्फत समाजमा सकारात्मक सन्देश दिएका थिए। प्रतियोगिताले “हरेक महिला विजेता हो” भन्ने सन्देशलाई प्राथमिकता दिँदै परम्परागत सौन्दर्य प्रतियोगिताको परिभाषालाई फराकिलो बनाएको आयोजकको भनाइ छ।
यस प्रतियोगितालाई महिलाको सशक्तिकरणको प्रभावकारी प्लेटफर्मका रूपमा हेरिएको छ, जसले विवाहपछि पनि महिलाले आफ्ना सपना पूरा गर्न सक्ने सन्देश समाजमा प्रवाह गरेको छ।