नवनियुक्त प्रधानमन्त्री कार्कीले ६ महिनाभित्र निर्वाचन गराइसक्नुपर्ने

भदौ २७, काठमाडौं । पूर्वप्रधानन्यायाधीश सुशीला कार्कीले नेपालको अन्तरिम प्रधानमन्त्रीको रूपमा पद तथा गोपनीयताको शपथ ग्रहण गरेकी छिन्। शीतलनिवासमा आयोजित विशेष समारोहमा राष्ट्रपति रामचन्द्र पौडेलले उनलाई शपथ खुवाएका हुन्। 
यो नियुक्तिले उनलाई नेपालको पहिलो महिला प्रधानमन्त्रीको ऐतिहासिक जिम्मेवारी पनि प्राप्त भएको छ।

राष्ट्रपति कार्यालयको विज्ञप्ति अनुसार, मुलुकमा उत्पन्न असाधारण परिस्थितिलाई सम्बोधन गर्न र युवा पुस्ता ९जेन–जी० को आन्दोलनबाट प्रकट भएको इच्छा र आकांक्षालाई सम्मान गर्दै, राष्ट्रपति पौडेलले राजनीतिक दलहरू र सरोकारवालाहरूसँगको परामर्शका आधारमा संविधानको अन्तरनिहित अधिकार प्रयोग गरी कार्कीलाई अन्तरिम प्रधानमन्त्रीमा नियुक्त गरेका हुन्। उनलाई ६ महिनाभित्र प्रतिनिधिसभाको अर्को निर्वाचन सम्पन्न गर्ने म्यान्डेट दिइएको छ।

विज्ञप्तिमा भनिएको छ, “राष्ट्रपति श्री रामचन्द्र पौडेलले नेपालको संविधानको पालना, संरक्षण र राष्ट्रिय एकताको प्रवर्द्धनका लागि प्रधानमन्त्रीको सिफारिस र सम्मतिमा संवैधानिक व्यवस्था बमोजिम मोरङकी सुशीला कार्कीलाई अन्तरिम सरकारको प्रधानमन्त्रीमा नियुक्त गर्नुभएको छ।”

शपथ समारोहमा कार्कीले नेपालको संविधानको धारा ८० बमोजिम प्रधानमन्त्री पदको गोपनीयताको शपथ लिएकी छिन्। यो नियुक्ति र शपथले मुलुकको राजनीतिक परिदृश्यमा नयाँ तरंग ल्याएको छ। कार्कीको नेतृत्वमा गठित अन्तरिम सरकारले आगामी ६ महिनाभित्र निर्वाचन सम्पन्न गरी मुलुकलाई नयाँ दिशा दिने अपेक्षा गरिएको छ।