४० नृत्यकारले सप्ताहव्यापी प्रशिक्षणमा नृत्यक्षर कला सिके

चैत २० काठमाडौं । नेपाल संगीत तथा नाट्य प्रज्ञा प्रतिष्ठानले गत मङ्गलवारबाट यो मङ्गलवारसम्म आयोजना गरेको सप्ताहव्यापी नृत्यक्षर विज्ञान प्रशिक्षणमा ४० जना नृत्यकारहरुले नृत्य सम्बन्धी व्याकरणीय कला सिकेका छन् । उनीहरूले सैद्धान्तिकसँग प्रयोगात्मक प्रशिक्षण समेत लिएका छन् । सो प्रतिष्ठानको नृत्य विभागद्वारा यो प्रशिक्षणको आयोजना गरिएको हो ।
नेपाल संगीत तथा नाट्य प्रज्ञा प्रतिष्ठानको सभाकक्षमा नियमित रूपमा ४० जना नृत्यकारहरुले यो प्रशिक्षण लिएका छन् । उनीहरूलाई मङ्गलवार सो प्रतिष्ठानका उपकुलपति शम्भु राई, सदस्य सचिव प्रगति महरा, परिषद् सदस्य एवम् नृत्य विभाग प्रमुख सुवर्ण हमाल, नेपालका प्रथम नृत्य निर्देशक भैरवबहादुर थापालगायतले प्रमाणपत्र प्रदान गरे ।

आफूहरूले यस अघि विभिन्न कार्यक्रममा नृत्य प्रस्तुत गर्दै आए पनि यसको शास्त्रीय तथा सैद्धान्तिक ज्ञानको अभाव भएकाले यो प्रशिक्षण निकै उपयोगी हुने प्रशिक्षार्थीहरूले कार्यक्रममा बताए । उनीहरूलाई दैनिक ६ घण्टाको दरले साप्ताहिक रूपमा ४९ घण्टाको प्रशिक्षण दिइएको थियो ।
प्रशिक्षण समापन समारोहका प्रमुख अतिथि एवम् नेपालका प्रथम नृत्य निर्देशक भैरवबहादुर थापाले प्रशिक्षार्थीहरूलाई प्रमाणपत्र वितरण गर्दै यो प्रशिक्षणले नृत्य कलाकारमा व्यवहारिकसँगै सैद्धान्तिक ज्ञान वृद्धि भएको बताए । नेपाल संगीत तथा नाट्य प्रज्ञा प्रतिष्ठानका उपकुलपति शम्भु राईले यसरी नृत्य क्षरमा आधारित रहेर नेपालमा पहिलो पटक प्रतिष्ठानले यस्तो प्रशिक्षण दिएको जिकिर गरे  ।

यस्तै राष्ट्रिय सभा सदस्य जगप्रसाद शर्माले पनि प्रशिक्षण सधैँ उपयोगी हुने बताउँदै त्यहाँ सिकेका कुरालाई जीवनमा लागु गर्न विधार्थीहरुलाई उनले सुझाव दिए । यसै गरी सो प्रतिष्ठानकी सदस्य सचिव प्रगति महराले पनि नृत्य सम्बन्धी यो प्रशिक्षण विगतको भन्दा निकै फरक र थप उपयोगी भएको जिकिर गरिन् ।

नेपाल संगीत तथा नाट्य प्रज्ञा प्रतिष्ठानको प्राज्ञ परिषद् सदस्य तथा नृत्य विभाग प्रमुख सुवर्ण हमालले नृत्यको व्याकरणबारे नृत्यकारहरुनै अनविज्ञ भएको बेला यो प्रशिक्षण नृत्य कलाकारलाई दिएको बताए । जसबाट नृत्य कलाकारलाई सैद्धान्तिक र व्यवहारिक ज्ञान मिलेकोमा भन्दै एक साताको प्रशिक्षणमा नृत्य कलाकारहरूले सोचेको भन्दा बढी नै सिक्ने अवसर पाएको पनि हमालले बताए । सप्ताहव्यापी नृत्यक्षर प्रशिक्षण कार्यक्रममा उनीहरूलाई नृत्य निर्देशक कृष्ण प्रसाद पौडेल र अनमी बोहराले प्रशिक्षण दिएका थिए । प्रशिक्षार्थीहरूलाई यस पटक नृत्य क्षण अर्थात् नृत्यको सैद्धान्तिक ज्ञान, भाव, मुद्रासँगै प्रयोगात्मक रूपमा नृत्य प्रशिक्षण दिएको पौडेलले बताए । कार्यक्रममा लिएको नृत्य प्रशिक्षण अन्तर्गतको नृत्य गरेर समेत उनीहरूले कार्यक्रममा देखाए ।

आफूहरूले अभ्यासका क्रममा गरेको नृत्यका भावहरू सहितको प्रस्तुति सम्बन्धित कलाकारहरूले देखाएका थिए । समापन समारोहमा प्रशिक्षार्थी निर्मला नेपाल र दीपेश माझीले आफ्नो अनुभव सुनाउँदै यस पटक नृत्य क्षर सम्बन्धी प्रशिक्षण लिँदा आफूहरूले गरिरहेको नृत्यका बारेमा अझ राम्ररी बुझ्ने अवसर पाएको बताए ।