हुरीले घर नजिकैको सल्लाको रूख ढल्दा एक महिलाको गयो ज्यान

जेठ ०७ काठमाडौं । डडेल्धुराको आलिताल गाउँपालिका–६ दोबाटोमा हावाहुरीले सल्लाको रूख ढलेर लाग्दा एक महिलाको ज्यान गएको छ।

घर बाहिर निस्कने क्रममा रूखको हाँगा लागेर रतन कामीकी २७ वर्षीया श्रीमती रबिना कामीको घटनास्थलमै मृत्यु भएको डडेल्धुरा प्रहरीले जनाएको छ।

प्रहरीका अनुसार बिहान करिब ६ बजे पानीसँगै आएको हावाहुरीले घर आँगनमै रहेको सुकेको सल्लाको रूख ढलेको थियो। रूखको हाँगा रबिनाको टाउको र कम्मरमा लागेपछि उनको घटनास्थलमै मृत्यु भएको हो। घटनामा मृतककी सासू ४५ वर्षीया राधा कामीको बायाँ खुट्टामा सामान्य चोट लागेको प्रहरीले जनाएको छ।

उक्त हावाहुरीले कामी परिवारको माटो र काठले बनेको, जस्ताको छानो भएको घरमा पनि क्षति पुर्‍याएको छ। घरको ६ वटा कडी र ७ वटा जस्ता पाता क्षतिग्रस्त भएको जनाइएको छ। 

घटनाको जानकारी पाएपश्चात अस्थायी प्रहरी पोष्ट धिमडाबाट प्रहरी हेमराज कठायतको नेतृत्वमा २ जनाको टोली घटनास्थलमा खटिएको थियो। त्यसपछि थप अनुसन्धानका लागि इलाका प्रहरी कार्यालय जोगबुढाबाट प्रहरी निरीक्षक सुरज रोकायाको कमाण्डमा  सहायकसहित ७ जनाको टोली परिचालन गरिएको थियो।

डडेल्धुरा प्रहरी प्रमुख प्रहरी नायब उपरीक्षक (डिएसपी) सुगन्ध श्रेष्ठले घटनास्थलको निरीक्षणपछि मृतकको शव पोष्टमर्टमका लागि जोगबुढा अस्पताल पठाइएको जानकारी दिए।

प्रहरीका अनुसार घटनास्थल अस्थायी प्रहरी पोष्ट धिमडाबाट करिब १५ किलोमिटर पश्चिममा पर्छ।