बेवारिसे सडक मानवको सहयोगार्थ महायज्ञ

चैत २१ काठमाडौं । सडकमा अलपत्र परेका, अनाथ, असह्य एवं बेवारिसे सडक मानवको उद्धार, उपचार, आश्रय, शिक्षा, स्वास्थ्यको व्यवस्था गर्दै आएको मानव कल्याण समाज भक्तपुरद्वारा आयोजित श्रीमद्भागवत सप्ताह ज्ञान–विज्ञान महायज्ञ आजदेखि सुरु भएको छ।

महायज्ञको शुभारम्भका क्रममा आज राधेराधेस्थित महायज्ञस्थलबाट सुरु भएको कलश यात्रा मध्यपुरथिमिको वडा नं ५ देखि ९ सम्मको विभिन्न क्षेत्रको परिक्रमा गरी महायज्ञस्थलमा आएर समापन भएपछि पण्डित दीनबन्धु पोखरेल र जीवन विज्ञान विशेषज्ञ रमेश नेपालले शुभारम्भ गरेका छन्।

समाजले हाल भक्तपुरको झौखेलमा एउटा टहरामा ४१ जना बेवारिसे सडक मानव राखेर पालनपोषण गर्दै आएको छ। समाजका सचिव विजयकुमार पोखरेलका अनुसार, मानव कल्याण समाजले काठमाडौँको पशुपति, काभ्रेको पनौती र धुलिखेल, दाङको तुलसीपुर, बाराको निजगढमा गरी ५०५ जनालाई खाना, नाना, छाना, स्वास्थ्य उपचारसहितको सेवा दिँदै आएको छ।

दुई हजार १०० सडक मानव तथा बेवारिसे मानवको उद्धार गरी परिवारमा पुनस्र्थापना गरिसकेको समाजकी संस्थापक अध्यक्ष एवं महायज्ञकी सुमि मानवले बताए। भक्तपुरबाट सुरु भएको अभियान अन्तर्गत अन्यत्रका पाँच शाखामा स्थायी÷अस्थायी संरचनाको व्यवस्था भए पनि भक्तपुरमा भाडाको साँघुरो घरदेखि सोवादिन कठिनाइ भएपछि महायज्ञमार्फत सहयोग सङ्कलन गरेर स्थायी बसोबासको व्यवस्था मिलाउन लागिएको अध्यक्ष मानवले बताए।

मध्यपुरथिमि नगरपालिका–५ राधेराधेस्थित यातायात कार्यालयसँगै सुरु भएको महायज्ञ २७ गतेसम्म सञ्चालन हुने महायज्ञ आयोजक मूल समारोह समितिका संयोजक गोपी न्यौपानेले बताए।

“२०७२ सालदेखि नै सडकमा बेवारिसे रहेका मानवहरूलाई चाउचाउ, बिस्कुट तथा पानी बाँड्ने अभियानबाट सेवाको सुरुआत गरेका थियौँ, अहिले झौखेलमा एउटा भाडाको टहरामा ४१ जना बेवारिसे बुबाआमा राखेर नाना, खाना र छानाको व्यवस्था गरेका छौँ”, अध्यक्ष मानवले भने, “समाजले अहिलेसम्म १५१ जना अनाथ बालबालिकालाई काभ्रेमा राखेर पठनपाठन र सँगै सबै जिम्मेवारी उठाएका छौँ, अहिलेसम्म हामीले दुई हजार १०० सडक मानव तथा बेवारिसे मानवको उद्धार गरिसकेका छौँ, कतिले सेवा घरमै प्राण त्याग्नुभयो, कतिलाई पारिवारिक पुनर्मिलन गरायौँ, यो दायित्वलाई स्थायित्व दिन महायज्ञ आयोजना गर्न लागेका हौ।”