बम आतंकका पटके : कारागारबाट छुट्दै, आतंक सृजना गर्दै

चैत २२ काठमाडौं ।  गत पुस १६ गते सुनसरीको इटहरीमा नक्कली बम ‘होक्स’ राखेर आतंक सिर्जना गरेको आरोपमा प्रहरीले दुई जनालाई पक्राउ गर्‍यो ।

बुधबार झापाको दमक नगरपालिका-१ का ४७ वर्षीय सञ्जय भनिने खगेन्द्र खरेल र इटहरी उपमहानगरपालिका-४ की ३६ वर्षीय लक्ष्मीदेवी थापालाई प्रहरीले पक्राउ गरेको हो ।
गत पुस १६ गते इटहरी उपमहानगरपालिका कार्यालय अगाडि, सुनसरी-मोरङ जोड्ने बुढीखोला पुल र धरान-इटहरी जोड्ने भोटेखोला पुलमा बम राखेको सूचना प्रहरीलाई आएको थियो ।

प्रहरीलाई आएको सूचनामा मान्छे मार्ने उद्देश्य नभई पुल भत्काउने उद्देश्य रहेको उल्लेख थियो । प्रहरीले खोजी गर्दा इटहरी उपमहानगरपालिका अगाडि नक्कली बम होक्स फेला पर्‍यो ।
बुढीखोला र भोटे पुलमा केही फेला परेन । पुस १६ गते प्रहरीलाई बम राखेको खबर गरेर उनी भारत भागेका थिए ।

प्रहरीको रेकर्डमा खरेल पटके अपराधी हुन् । उनी शृङ्खलावद्ध बम आतंकमा संलग्न छन् । दुई पटक कारागार पनि बसेका थिए ।

बम काण्डमा पक्राउ पर्नुअघि उनी झापा र सुनसरीमा दुई पटक करागार बसेका हुन् । पछिल्लो पटक उनी गत असोज १४ गते छुटेका थिए ।

कारागारबाट छुटेको तीन महिनापछि पुसमा आतंक सिर्जना गरेका उनी चैत २० गते पुनस् पक्राउ परेका हुन् । पुस १६ गतेको घटनापछि भारत पसेका खरेलले ह्वाट्सएप एपमार्फत प्रहरीलाई ३१ वटा जिल्लामा बम राख्ने धम्की दिएका थिए, त्यसपछि उनले संघीय संसद भवनमा ड्रोन खसाल्ने धम्की दिए ।

पटकपटक आतंक सिर्जना गर्न खोजेपछि प्रहरीको केन्द्रीय अनुसन्धान ब्यूरोको टोलीले खरेललाई पक्राउ गरी सुनसरीको जिम्मा लगाएको प्रहरी स्रोतले बताएको छ  ।

‘यो मान्छे प्रविधिमा पोख्त छ, ह्वाट्सएपमार्फत पार्लियामेन्टमा ड्रोन खसाल्छु भन्छ,’ प्रहरी स्रोतले भन्यो,‘पटक–पटक आतंक सिर्जना गर्ने यो पटके हो ।’

बुधबार पक्राउ परेका दुई जनाविरुद्ध बिहीबार पाँच दिन म्याद थप भएको इलाका प्रहरी कार्यालय इटहरीमा डिएसपी लक्ष्मी भण्डारीले बताए ।

अनुसन्धानमा खटिएको प्रहरी स्रोतका अनुसार पछिल्लो पटक २०७८ चैत १४ इटहरी उपमहानगर- २ स्थित नवजागृति टोलमा बम विष्फोटको घटनामा खरेल संलग्न थिए । त्यसबेला बम विष्फोट भएको घरको डेरा हाल पक्राउ परेकी थापाको थियो ।
सुतली बम बनाउने क्रममा विस्फोट हुँदा रविन थापा र लमजुङका शेरजङ गुरुङ घाइते भएका थिए । सो घटनामा प्रहरीले घाइते भएका दुईसहित लक्ष्मीदेवी थापा र सञ्जय भनिने खगेन्द्र खरेललाई पक्राउ गर्‍यो । २०७९ जेठ २० गते कारागार चलान भएका खरेल २०८१ असोज १४ गते कारागारबाट छुटेका थिए ।

खरेल कारागार चलान भएको घटना त्यो नै पहिलो भने होइन । २०७६ वैशाखमा झापाको कन्काई नदीको पुलमा खरेलकै समूहले बम राखेको थियो ।

त्यसबेला गोर्खा जनमुक्ति पार्टीको नाममा राखेको बम प्रहरीले डिस्पोज गर्‍यो । सो घटनामा संलग्न भएको आरोपमा प्रहरीले खरेलसहित पाँच जनालाई पक्राउ गरेको थियो । बम आतंक सिर्जना गरेको अभियोगमा पक्राउ परेका उनी २ वर्ष कारागार सजायपछि छुटेका थिए ।

झापा कारागारबाट छुटेलगत्तै उनी सुनसरीको बम विष्फोटको घटनामा समातिएका थिए । खरेलले हिमाल सुरक्षा परिषद् गठन गरेका थिए ।

को हुन् खरेल ?

२०३४ साल वैशाख १७ गते ताप्लेजुङमा जन्मिएका खरेल बुबाआमासँगै भारत बस्थे । हाल उनका बुबा-आमा झापामा बस्छन् । आफन्त भने असाममा बस्छन् । असाममै पढेका खरेल सन् १९९७ मा भारतीय सेनामा भर्ना भएर केही वर्ष काम गरेको प्रहरी स्रोत बताउँछ ।

भारतीय सेनामा हुँदा उनले बम बनाउन र हतियार चलाउन सिकेको प्रहरी स्रोतले बतायो । जागिर छाडेपछि उनी सन् २००८ मा नेपाल आएका थिए । उनी वैदेशिक रोजगारीका लागि दुबई पनि गएका थिए । प्रहरीका अनुसार उनी ग्रेटर नेपालको अभियान र हिन्दूराष्ट्र नेपालको अभियान चलाइरहेका छन् ।