वैशाख २६ काठमाडौं । प्रेम सम्बन्ध राखेर युवतीलाई भारतमा बेचबिखन गरेको आरोपमा प्रहरीले एक जना युवकलाई पक्राउ गरेको छ।
बैतडीको पञ्चेश्वर गाउँपालिका-४ का २३ वर्षीय मोहनबहादुर चन्दलाई प्रहरीले पक्राउ गरेको छ।
बिहीबार अछामको पञ्चदेवल बिनायक नगरपालिका-५ लयाटीस्थित आफन्तको घरबाट पक्राउ गरेको जिल्ला प्रहरी कार्यालय अछामका डिएसपी ईश्वरीप्रसाद भण्डारीले जानकारी दिए।
बैतडीका चन्द भारत बस्दै आएका थिए। उनले विभिन्न युवतीहरूसँग सामाजिक सञ्जालमार्फत चिनजान तथा सम्बन्ध बनाउने काम गर्थे।
आफू अविवाहित रहेको र विवाह गर्ने भन्दै विभिन्न युवतीसँग कुराकानी गरी प्रलोभनमा पार्ने गरेको प्रहरीको अनुसन्धानमा खुलेको छ।
त्यसरी युवतीलाई भारतसम्म लगेर बेचबिखन गरेको आरोप उनीमाथि छ।
चन्दले अछामकै एक युवतीलाई त्यसरी नै भारत पुर्याएको आरोपपछि प्रहरीले पक्राउ गरेको हो।
अछामकी युवतीलाई गत कात्तिक २८ गते त्यस्तै प्रलोभनमा पारेर भारत पुर्याएका थिए।