प्रेम प्रस्ताव अस्वीकार गर्दा गोली प्रहार, घाइते युवतीलाई चितवन रिफर गरियो

वैशाख ६ काठमाडौं ।  बुटवल उपमहानगरपालिका बुद्धनगरमा आज बिहान गोली प्रहारबाट गम्भीर घाइते भएकी टीका विष्टको रुपन्देहीमा उपचार नभएपछि चितवन पठाइएको छ । 
पाल्पाको रैनादेवी छहरा गाउँपालिका घर भई हाल बुटवल उपमहानगरपालिका वडा नं ११ बुद्ध नगरमा होटेल सञ्चालन गर्दै आएकी २९ वर्षीय युवतीलाई एक युवकले गोली प्रहार गरी घाइते बनाएका थिए । 

उनको लुम्बिनी प्रादेशिक अस्पतालमा उपचार हुन नसकेपछि थप उपचारका लागि भैरहवास्थित युनिभर्सल मेडिकल कलेजमा रिफर गरिएको थियो । त्यहाँ पनि उपचार हुन नसकेपछि थप उपचारका लागि चितवन रिफर गरिएको रुपन्देहीका एसपी रञ्जित सिंह राठौरले बताए । 
घटनालगत्तै उपचारका लागि लुम्बिनी प्रादेशिक अस्पताल लगिएको थियो । त्यहाँ उपचार हुन नसकेपछि भैरहवा र यहाँ गोली निकाल्न सकिएपछि साढे ४ बजेतिर भैरहवाबाट चितवन रिफर गरिएको प्रहरीले जनाएको छ । 
प्रेम प्रस्ताव अस्वीकार गर्दा गोली प्रहार

पाल्पाबाट बुटवल–११ बुद्धनगर आएर केही समयदेखि विष्टले खाजा घर सञ्चालन गर्दै आएकी थिइन् । सधैँजस्तै आज शनिबार बिहान पनि पसल खोलेर सरसफाइ गर्न थालेकी विष्टलाई बिहान ९ बजेतिर भारतीय नम्बर प्लेटको मोटरसाइकल चढेर आएका युवकले गोली हानेका थिए । 

त्यसपछि स्थानीय जम्मा भएर हल्लाखल्ला गरेका थिए । गोली प्रहार गरेका युवक तत्काल भाग्न भ्याए । विष्टलाई कम्मरमाथि गोली लागेको छ । गोली प्रहार गर्ने भारतीय नागरिक आलम अन्सारी रहेको प्रहरीले खुलाएको छ ।

विष्ट र ती भारतीय केही समयअघिदेखि प्रेम सम्बन्धमा रहेका खुलेको छ । आफूसँग बिहे नगरे विभिन्न धम्की दिँदै विष्टलाई हतियारको पनि तस्बिर पठाउने गरेका थिए । अन्सारी २३–२४ वर्षका र विष्ट २९ वर्षका हुन् । प्रहरीले आमलको ठेगाना अझै स्पष्ट नभएको बताएको छ । इलाका प्रहरी कार्यालय बुटवल डीएसपी इन्द्र बहादुर रानाले आलमले विष्टलाई बिहे नगरे जे पनि गर्ने भन्दै धम्काएका अनुसन्धानबाट खुलेको बताएका छन् ।

स्थानीयका अनुसार ती भारतीय युवक र विष्टबिच केही समय पहिला भनाभनसमेत भएको थियो । गोली प्रहारबाट ती युवा भारततर्फ भाग्न सक्ने भएकाले सीमानाकामा कडा निगरानी राखिएको जिल्ला प्रहरी कार्यालय रुपन्देहीमा एसपी रञ्जित सिंह राठौरले बताए ।

प्रहरीले युवकको तस्बिरसमेत भेट्टाएको छ ।