प्रकृति लम्साल मृत्यु प्रकरण : आरोपी अझै थुनामा

वैशाख २४,काठमाडौं ।  भारतको ओडिसास्थित भुवनेश्वरमा रहेको कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयमा मृत भेटिएकी नेपाली छात्रा प्रकृति लम्साल घटनाको दोषी अझै थुनामा रहेका छन्।

सोही कलेजमा मृत भेटिएकी अर्की छात्रा प्रिसा साह घटनाको रिपोर्टिङ गर्न पुगेको नागरिक संवाददाताहरूसँग कुरा गर्दै ओडिसास्थित भुवनेश्वर प्रहरीले लम्साल घटनाको दोषी अझै थुनामा रहेको बताएका हुन्।

भुवनेश्वर प्रहरी कमिस्नार डा। सुरेश देवदत्त सिंहले प्रकृति लम्साल घटनाको दोषी अहिले पनि थुनामा रहेको र अहिले प्रिसा घटनाको अनुसन्धान पनि राम्रोसँग गरिरहेको बताए। सिंहले भने, अपराधको अनुसन्धानमा देशको सीमा हुँदैन, विदेशी स्वदेशी नागरिकमा भेदभाव हुँदैन । अपराध गर्ने नागरिक जहाँको भएपनि अपराधी नै हुन्छ । उसलाई कानुनी दायरामा ल्याउन कोही कसैले छेक्दैन । हामीले अघिल्लो प्रकृति लम्सालको मृत्युको अनुसन्धान पनि तथ्यमा आधारित भएर गरेका छौ । र दोषी अहिले पनि थुनामा रहेको छ ।

गएको फागुन ४ गते प्रकृति आफ्नै होस्टेलको कोठामा मृत भेटिएकी थिइन्। उनी झुन्डिएको अवस्थामा भेटिएपछि त्यहाँ अध्ययनरत नेपाली विद्यार्थीले निष्पक्ष छानबिनको लागि दबाब दिँदै आन्दोलन गरेका थिए।

प्रकृतिलाई उनको केटा साथी आद्विक श्रीवास्तवले बारम्बार मानसिक यातना दिएको र सो सम्बन्धमा विश्वविद्यालय प्रशासनसमक्ष पटक पटक उजुरी पनि गरिएको नेपाली विद्यार्थीको भनाइ थियो। तर विश्वविद्यालय प्रशासनले गम्भीरतापूर्वक नलिँदा घटना भएको भन्दै नेपाली विद्यार्थी आन्दोलनमा उत्रिएका थिए।

प्रहरीले प्रकृतिलाई मानसिक यातना दिएको भन्दै उनको केटा साथी आद्विक श्रीवास्तवलाई पक्राउ गरेको थियो। अभियुक्त श्रीवास्तव अहिले भुवनेश्वरस्थित प्रहरी हिरासतमा छन्। उनीसँग आवश्यकताअनुसार सोधपुछ भइरहेको प्रहरीले जनाएको छ।