महिला सिस्नुको पाउडर बनाई बिक्री

पुस १९, काठमाडौं। त्रिपुरासुन्दरी गाउँपालिका–२, लाटु चोकटीका १० जना थामी समुदायका महिला सिस्नुको पाउडर बनाई बिक्री गरेर आत्मनिर्भरतातर्फ उन्मुख भएका छन्। 

सिस्नुको पात टिपेर, पानीमा सफा गरी घाम र सोलारमा सुकाएर धुलो बनाई ब्रान्डिङ गरेर उनीहरूले बिक्री गर्दै आइरहेका छन्।

खेर गइरहेको सिस्नुलाई सदुपयोगमा ल्याउन महिलाले २०७९ सालबाट ब्रान्डिङ गरेर बिक्री गर्न थालेका हुन्। पारिवारिक निजी वन सङ्घ नामक संस्थाले उनीहरूलाई सिस्नुको पाउडर बनाएर बिक्री गर्न तालिम दिएको थियो। 

घरव्यवहार, मेलापातको कामसँगै फुर्सदको समयमा सिस्नु टिपेर महिलाले आम्दानी लिँदै आएका हुन्। लाटुकी ५६ वर्षीय जुनीमाया थामीले फुर्सद र सिजनका बेला सिस्नुको धुलो बनाई बिक्री गर्दा वार्षिक एक लाख रुपियाँ हाराहारीमा कमाइ हुने गरेको बताइन्।  

उक्त आम्दानी बालबच्चाको पठनपाठन र घरायसी प्रयोजनमा खर्च गरी बचत पनि गर्दै आएको उनले जानकारी दिए।  सिस्नु टिपेर ब्रान्डिङ गरी बिक्री गर्दा परिवारको घरखर्च, छोराछोरीको शिक्षादीक्षाका साथै आपत्विपत्मा काम लागेको ५० वर्षीय वसन्ती थामीले बताइन्। उन जस्तै १० जना महिलाले सिस्नु टिपेर पाउडर बनाई बिक्री गरेर राम्रो आम्दानी गर्दै आएका छन्।

उनीहरूले गाउँमै सामूहिक फार्म दर्ता गरी सिस्नुलाई ब्रान्डिङ गरेर बिक्री गर्दै आएका छन्। सिस्नुको पाउडर अर्गानिक, ताजा, स्वादिलो भएकाले राजधानीमा माग उच्च रहेको उनीहरू बताउँछन्।

गाउँमै उत्पादन भएको धनियाँ, जिरा, लसुनको धुलो हालेर सिस्नुलाई पाउडर बनाएकाले माग बढेको उनीहरूको अनुभव छ। उनीहरूका अनुसार सिस्नुको पाउडर किलोको छ सय रुपियाँमा बिक्री हुँदै आएको छ। थामी महिलाले गरेको उक्त कामको अनुसरण गाउँघरका अन्यले पनि गर्न थालेका छन्।